Fandriampahalemana

Mahazina-Antsirabe Nahatrarana rongony sy fitaovana fanaovana vola sandoka

Fandriampahalemana
Talata 14 Novambra 2017

Mitohy ny famongorana ny fiparitahan’ny zava-mahadomelina ao Antsirabe. Saron’ny polisim-pirenena indray ny tokantrano iray ahiana ho mpamatsy rongony tao amin’ny fokontany Mahazina.

Nisy ny fangatahana taratasy tany amin’ny fitsarana nahafahana nanao ny fisavana ny tokantranon’izy ireo ka nahatrarana rongony nilanja 2kg. Ankoatra ny rongony moa dia nahatrarana fitaovana hafa fonosana roa izay heverina ho fanaovana vola sandoka ihany koa ary nisy fanafody be dia be. Araka ny fanazavana nentin’ny kaomisera divizionera Ramilison Céléstin, lehiben’ny polisim-pirenena Vakinankaratra dia tsy mitsahatra ny mikaroka ny fametrahana ny fandriampahalemana izy ireo. Azo antoka fa matoa misy ireo akora fanaovana vola sandoka dia mandehandeha any ny fitaovana fanaovana azy. Manao antso avo ho an’ny vahoaka ny tenany amin’ny fanomezam-baovao samihafa. Ny fitobahan’ny mahadomelina no fototry ny tsy fandriampahalemana ka hiantsoany fifanomezan-tanana. Roa volana lasa izay dia nisy ny fahatrarana rongony nilanja 50 kilao tao Antsirabe ary niampy indray ny loharanom-baovao hafa nahitana ireto olona mpianaka ireto.

Caius R