Fandriampahalemana

Partagé sur :
• facebook

Lehilahy miisa 04 no voasambotra tany amin’ny distrikan’i Mahanoro ny Talata 24 janoary teo rehefa nanondrana sy nitondra taolam-paty tany an-toerana.

Nahazo fanampim-baovao mari-pototra ny polisim-pirenena tao amin’ity distrika iray ity mahakasika ny fisian’ny halatra taolam-paty sy ny fivezivezen'izany any an-toerana . Araka izany dia nohamafisina ny fisafoana ny fiara na ny lakana ary ny olona mifamezivezy tany an-toerana . Vokany, tratra tamin’ny talata teo teny amin’ny toby fiantson-dakana tao Mahanoro izy ireo tokony ho tamin’ny 10 ora sy sasany. Hafahafa fihetsika izy efa-dahy ireto ka tsikaritry ny polisy. Milanja gony feno zavatra izy ireo tamin'izany. Vao nahita azy ireo ny mpitandro ny filaminana teo an-tseranana dia nisava azy ireo. Nikoropaka ireto olon-dratsy ka vaky nandositra ny roa tamin’izy ireo ary ny roa hafa kosa, izay tompon’antoka amin’ity fanondranana taolam-paty ity dia voasambotra teo no eo ihany . Rehefa nosavaina ny gony teny amin’izy roalahy voasambotra ireto dia nahitana : taolan-dava iray gony izay milanja 50 kilao sy tavoahangy misy ody gasy iray. Tsy nijanona hatreo anefa ny polisim-pirenena fa mbola nizaha ireo olona roa hafa tafatsoaka tamin'io fotoana io .Nitohy ny fikarohana ka tokony ho tamin’ny 11 ora alina dia tratra ihany koa tsy lavitra ny seranan-tsambo ireto roalahy tafatsoaka ireto . Araka ny fanadihadiana natao tamin’izy ireo dia ny roa no tena tompon’antoka sy nitondra ireto taolam-paty ireto ary ny roa hafa kosa dia mpanera. Mitohy ny fanadihadiana hataon’ny Polisy mahakasika ity raharaha ity.
Pati Legende : Ireto izy efa-dahy sy ilay gony nitondrany taolam-paty !
 

Tia Tanindrazana

Samia mijoro ho an'i Gasikara.