LEHILAHY NISY NAMONO TAO BRICKAVILLE

Ilay taizany ihany no nahavanon-doza

Fandriampahalemana
Zoma 16 Mey 2025

Nitrangana vono olona feno habibiana tao Nierenana, distrikan’i Brickaville ny 13 Mey

lasa teo tokony ho tamin'ny 12 ora atoandro. Lehilahy iray 58 taona no nisy namono tamin’izany ka nidina teny an-toerana nijery ny zava-nisy ny zandary avy ao amin'ny borigady territoriale Brickaville sy ny dokotera. Tratra ny alin'io ihany ilay nahavanon-doza izay tsy iza fa ilay zana-drahavavin'ny vadiny izay notazaina tao antrano ihany, hoy ny vaovao. Araka ny voalaza moa dia disadisam-piaraha-monina no nahatonga azy hanao izany noho ny resaka tany lova. Olona efa mpamerin-keloka ity tovolahy ity, raha ny fantatra. Efa nanakan-dalana tamin'ny lalam-pirenena faharoa izy ny volana Aprily taona 2024. Olona avy eo anivon’ny fiadidian’ny Repoblika avy any Antananarivo hamita iraka tany Toamasina no novelesin'izy ireo ny fiara tsy mataho-dalana nentiny ka very tamin’izany ireo fitaovana marobe. Mbola tratra tao an-tranony ihany koa ireo fitaovana ireo saingy tsy fay ny tovolahy fa mbola izao nahavita namono ny olona nitaiza azy izao indray.
Pati
Legende : Ity ilay ranamana !