Fandriampahalemana

LEHILAHY NIKASA HANGALATRA TAXI Mody nanao mpanjifa, tsy nisy vola nefa nahitana antsy maranitra iray

Fandriampahalemana
Zoma 13 Janoary 2023

Tena miharatsy ny fandriampahalemana eto amintsika. Lehilahy iray nanofa fiara karetsaka iray tamin’ny andro alina no nikasa hamono ilay mpamily ary haka ilay fiara ny alin’ny Alarobia teo tokony ho tamin’ny 09 ora alina.

Raha tsiahivina kely ny tantara dia nandray ity fiara karetsaka ity teny bypass io lehilahy io ka nilaza ny aterina eny Namontana.Teny an-dalana dia niteny ity farany fa ho eny amin'ny fasan-karana. Rehefa izay dia nilaza ny aterina eny Anosizato indray izy ary nilaza fa mbola tsy misy vola any aminy. Mailo araka izany ny mpamilin’ilay fiara karetsaka ka nijanona teo amin'ny tobin-dasantsy iray teo Ankadimbahoaka ary nampandre avy hatrany ireo mpitandro ny filaminana manodidina teo amin’ny manodidina. Tsy niandry ela ireo polisy ka tonga nijery ity olon-dratsy ity. Rehefa nosavaina izy dia tsy nahitana na inona na inona afa-tsy antsy iray. Tsy nisy vola koa tany aminy na dia ariary aza. Niaiky moa ity lehilahy ity fa nikasa hangalatra ity fiara-karetsaka nofainy ity. Nentina nihazo ny birao avy hatrany ity farany nanaovana ny fanadihadiana.
Pati