LEHILAHY HITA FATY

TAO IKONGO

Fandriampahalemana
Talata 01 Septambra 2026

Tsy teo intsony ny masony, ny lelany, ny fony....

Mbola misy hatrany ireo tsy maty voalavo an-kibo mamono ireo mpiray tanindrazana sy mangalatra taova. Lehilahy iray, tokony ho 22 taona indray no hita faty afak'omaly Alahady 30 Aogositra maraina, tao amin’ny fokontany Ambatoharanana, kaominina sy distrikan’Ikongo. Manodidina ny 50 metatra miala ny tanàna no nahitana ny razana raha olona iray handeha hiasa maraina no nahatsikaritra azy. Ity farany avy eo no nampandre avy hatrany ny tompon'andraikitra hoy ny vaovao azo. Niboridana tanteraka ilay tovolahy raha araka ny fantatra ary hita niankohoka teo amoron’ny lakandrano teo akaikin’ny kirihitr’ala. Nandritra ny fizahana no nahitana fa tsy teo intsony ny taova sasany tamin’ny vatany toy ny lelany, ny masony, ny fony, ny atiny ary ny tanana havanana izay nampametra-panontaniana ny maro hoe : natao inona ? Toraka izany koa ny hoe : tena nanam-potoana malalaka ireo mpamono olona namiravirana ny vatana mangatsiakan'ity tovolahy ity izay tombanana ho niaraka tamin'ny zava-mahadomelina mihitsy.Noho ny fahasimban’ny razana moa dia mbola tsy fantatra ny mombamomba azy hatramin'ny omaly fotoana nandevenana ilay nofo mangatsiaka tao amin'ilay Fokontany nahitana azy ihany. Miantso ireo fianakaviana manana havana tsy hita ny tompon'andraikitra ao Ikongo noho izany mba hanatona ny Fokontany. Efa manao ny asany moa ireo mpitandro ny filaminana any an-toerana koa andrasana izay mety ho tohin'ity vono olona feno habibiana nitranga tao Ikongo ity.
Nangonin'i Pati
Légende : Horohoro no nahitana ny vatana mangatsiakan'ilay lehilahy !