«Kidnapping » sarintsariny

Nananan’ny banky 4 tapitrisa Ar, ka nanita-kevitra

Fandriampahalemana
Talata 23 Jolay 2024

Ny 16 jolay lasa teo no nisian’ilay raharaha voalaza fa nakana an-keriny «Quartier-mobile»

tany Ankidodona any amin’ny tanànan’Andranokotona, Kaominina Anjozorobe, adin’ny iray dia an-tongotra miala ny Renivohitry ny distrika. Avy nanatitra olona manan-draharaha hohadihadiana eny amin’ny zandary izy io, ka taorian’izay no nanjavona, ary nisy hafatra tonga tamin’ny havany tamin’ny alalan’ny finday fa nisy naka an-keriny izy, ary takiana ny handoavana vola 8 tapitrisa Ar mba ho tambin’ny famotsorana azy. Ny talata no voalaza fa nisian’ny fakana an-keriny, ary ny zoma no fotoana nomena hanomezana ilay volabe, narahina fepetra fa tsy mahazo mampandre ny zandary. Herinandro latsaka aty aoriana, nivoaka ny resaka fa ananan'ny Microcred vola 4 tapitrisa Ar eo ho eo ilay rangahy, ary izy tenany ihany no nanita-kevitra izy mba afahany mandoa trosa. Izy tenany ihany no namorona, hoe: nisy naka an-keriny. Rehefa tsy nisy nandefa vola dia, nandefa hafatra indray, niteny fa, efa votsotra izy ka tsenao aty, ka toerana tena lavitra ny tanàna no natorony. Ny mpitandro filaminana sy ny fokonolona efa reraka nivezivezy eraky ny tampon-tanety, efa nivonona hifampitady amin'ireo mpaka an-keriny, hay fandrebirebena sy tetika hitadiavam-bola no nataony. Vokany, nosamborin’ny mpitandro ny filaminana ary hatolotra ny fampanoavana ingahirainy.
Toky R