Fandriampahalemana

« Kidnapping »: Bizna ho lasa fomba amam-panao

Fandriampahalemana
Sabotsy 20 Janoary 2018

Sesilany tato ho ato ny firongatry ny fakana an-keriny. Teratany karana iray indray no lasibatra. Iza no tena ao ambadiky ity resaka fakana an-keriny ity ? Valifaty ve sa mety ho famotsiam-bola ?

        Ny zava-misy aloha dia tsy voafehy mihitsy ny tsy fandriampahalemana, indrindra ny fakana an-keriny eto amintsika. Marihina fa tsy ny teratany vahiny irery no iharan’ny asa ratsy fa na teratany Malagasy koa aza. Tsaroana eto, ohatra, ny fakana an-keriny ny zanaky ny mpandraharaha Naina Andriantsitohaina tetsy Andranobevava ny volana desambra teo. Mampanontany tena hoe misy tokoa ve ny fandraisan’andraikitry ny fanjakana ? Tsikaritra mantsy fa dia feno mpitandro ny filaminana mandeha an-tongotra sy mandeha fiara eraky ny tanàna kanefa tsy mitsaha-mitombo ny tahan’ny tsy fandriampahalemana toy ny harom-paosy, sinto mahery. Raha tsy mandray andraikitra haingana ny fitondrana sy ireo tompon’andraikitra mahefa dia ho lasa bizna vaovao  ity resaka fakana an-keriny ity. Maro mantsy ny olona vonona amin’ny zava-drehetra mba hikarohana vola amin’izao fotoana, ary tena mampanita-tsaina olona ny fahitana fa misy ny vola maika sy vetivety.