Fandriampahalemana

Jiolahy saika handositra Maty voatifitry ny zandary izy efa-dahy

Fandriampahalemana
Talata 05 Septambra 2017

Notafihin’ny jiolahy nirongo fitaovam-piadiana mahery vaika ny mpivarotra iray tao Tsaramiadana, kaominina Marokarima, distrikan’i Mananjary ny zoma 25 aogositra.

Maty voatifitra tamin’izany ny lehilahy tompon-trano. Norobain’izy ireo ny vola, vovo-bolamena 20 grama, rojo volamena 3, kavina volamena 5,... Nanao fanarahan-dia ny zandary tao Mananjary sy Manakara rehefa nahazo antso. Nandray ny andraikiny koa ireo Ben’ny tanàna sy ny fokonolona tamin’ny kaominina maro. Hitan’ny fokolonona tao amin’ny renirano mampisaraka ny distrikan’i Mananjary sy Ifanadiana ny lehihahy miisa 7 izay vahiny any amin’io toerana io, nikasa hiampita lakana hihazo ny distrikan’Ifanadiana. Ny 4 no tratra fa ny 3 tafatsoaka. Rehefa nosavain’ny fokonolona ny entany, dia nahitana basy kalaky roa, bala miisa 11 sy sabatra 1 ary antsy, niampy vola 30.000 Ariary. Tonga ny zandary, ka saika hoentina hamonjy ny toby borigady Vohilava izy 4. Ny 31 aogositra, rehefa tonga teo amin’ny toerana atao hoe Lavaerika-Ambalavolo, kaominina Antaretra, izay lalana mamaky ala dia niaraka nitsoaka tampoka ireo jiolahy, saika hanararaotra ny hatevin’ny ala sy ny fahalalahan’ny toerana. Rehefa tsy nety nijanona dia voatery nitifitra ny zandary ka lavon’ny bala tamin’izany izy efa-dahy, izay voalaza fa avy amin’ny kaominina Ambalakindresy - Ambohimahasoa avokoa.

Toky R