Fandriampahalemana

Jiolahy nirongo basy teny Ambodivona Voaroba ny vola 7 tapitrisa ariary

Fandriampahalemana
Alakamisy 14 Mey 2020

Atoandro be nanahary tokony tamin` ny 12 ora sy sasany no nanafihan` ireo jiolahy miisa efatra mirongo fitaovam-piadiana tranombarotra mpivarotra kodiarana iray tetsy Ambodivona.

Rehefa hikatona iny ny tsena dia niditra tao amin`ilay tsena ny roa tamin` ireo jiolahy ary nilaza fa hividy kodiarana. Nilaza kosa ny mpivarotra fa efa hanidy tsena. Nivoaka ireto roalahy ary ny namany roa hafa kosa dia teny ampitan` ilay tsena lasibatra no niandry. Vantany vao nivoaka ilay olona nitondra ny sakaosy misy ny vola mitentina 7 tapitrisa ariary dia nambanan` ireo olon-dratsy tamin` ny basy. Ny roalahy teny ampita kosa no nanapoaka basy in-droa ka niparitaka hatrany ny olona teny amin`ny manodidina. Nanararaotra nitsoaka avy ireo olon-dratsy. 30 minitra taorian` ny fanafihana vao tonga ny mpitandro filaminana. Nandritra ny fisafoana nataon` ireto farany no nahitàna ny vodim-bala napoakan` ireo jiolahy. Faritra anisan` ny mena eto an-drenivohitra ny etsy Ambodivona ary tsy vao izao no misy fanafihana amin`iny faritra iny.

Marigny A.