Fandriampahalemana

Partagé sur :
• facebook

Efa tsy rariny intsony ny herisetra, fakana an-keriny, fandrobana atao amin’ireo mpandraharaha, hoy ny fanambarana ofisialy navoakan’ny fianakaviamben’ny mpandraharaha eto Madagasikara omaly izay ahitana ireo fikambanana goavana toy ny CFOIM, SIM, GEM, FIVMPAMA, GEFP, FIOVA, GEPAM …

 Lasibatr’ireo tambajotran-jiolahy tato anatin’ny taona vitsy izay ireo mpandraharaha manerana an’i Madagasikara, hany ka tena misy akony amin’ny asa sy ny fitadiavana. Miantso ny fitondram-panjakana sy ireo tompon’andraikitra isan-tsokajiny eto amin’ny firenena ireo mpandraharaha ireo handray andraikitra sy hanolotra vahaolana mahomby amin’ity herisetra mitranga etsy sy eroa ity ka mba samy hilamin-tsaina ny rehetra tsy an-kanavaka. Nanindry mafy ny SIM na ny sendikan’ny indostria eto Madagasikara fa misy akony amin’ny fahazotoan’ireo mpamatsy vola ho tonga eto Madagasikara izao herisetra izao ka hampandringa ny sehatry ny fandraharahana amin’ny ankapobeny. Tena ilaina maika ny fametrahana paikady sy fepetra hentitra sady mahomby hiadiana amin’ny herisetra, ka ahafahana manana tontolon’ny fandraharahana milamina. Ny 14 mey lasa teo moa no nisy naka an-keriny ary tsy mbola hita popoka hatramin’izao i Yanish Ismael, 26 taona mpandraharaha ary zanaky ny tompon’ny SMTP. Io tranga io no tena nahafeno ny kapoaka ka nahatonga ireo mpandraharaha nitabataba amin’izay satria tahaka ny tany tsy misy fanjakana eto Madagasikara.

RTT

Tia Tanindrazana

Samia mijoro ho an'i Gasikara.