Fandriampahalemana

Halatra taribin’ny jirama Olona 9 no voasambotra tany Ambatondrazaka

Fandriampahalemana
Zoma 24 Febroary 2023

Ny halatra tabirin-jiron’ny JIRAMA ankoatra ny halatra jiro amin’ny ankapobeny no tena miteraka ny fahatapahan-jiro amina toerana iray.

Ho an’ny tananan’i Tsarahonenana Ambatondrazaka ohatra dia saika isan’andro no hiainan’ny mponina izany antony nanosika ireo tompon’andraikitra hanara-maso akaiky. Vokany, olona miisa 9 no indray nosamborina noho ny halatra taribin-jiro sy fitaovan'ny orinasa BETC Jiro Kanto, izay mpiara-miombon'antoka amin'ny orinasa JIRAMA andro vitsy lasa izay. Nanao fanangonan-tsonia ireo fokonolona sy ny Ben'ny tanànan'Imerimandroso araka izany ny mba hahafahana mampiditra am-ponja ireto nahavanon-doza ireto izay marihina fa vehivavy ny telo. Nitory azy ireo ihany koa ilay orinasa mpiara-miombon’antoka amin’ny JIRAMA. Omaly moa no niakatra fitsarana ny raharaha ka fantatra fa naiditra am-ponja vonjimaika ny sasany tamin’izy ireo. Efa nahavitan'izy ireo vilany mihitsy ireo tariby halatra, ary havadiny ho vola izany avy eo.
Pati