Fandriampahalemana

Halatra omby tany Betroka Zandary iray matin’ny dahalo

Fandriampahalemana
Zoma 30 Jona 2017

Mitohy hatrany ny asan-dahalo any amin’ireo kaominina ambanivohitra atsimon’ny nosy. Lavon’ny balan’ny dahalo tany Betroka omaly maraina ny zadary Adjudant Chef Pila Fanjanirina.

Naharay antso ny vondrom-paritry ny zandary tao Betroka omaly vao mangiran-dratsy fa misy dahalo manafika tanàna ao amin’ny kaominina ambanivohitr’i Bekijoro ao amin’ny distrikan’i Betroka. Nitranga ny fanafihana ary omby 100 no lasan’ireo dahalo. Raikitra ihany koa ny fanarahan-dia ka tokony ho tamin’ny 4 ora sy sasany maraina no nitranga ny fifampitifirana mahery vaika teo amin’ireo dahalo sy ny zandary. Araka ny fampitam-baovao avy any an-toerana dia mpamily ny fiaran’ny zandary ity adjudant chef namoy ny ainy ity. Tao anatin’ny fifanjevoana dia niraikitra tao anaty tatatra ny tongony ka tsy afaka nitsoaka izy. Voatifitra indray mandeha izy ka lavo tamin’ny tany, nanatona ireo dahalo ka nanaram-po nitifitra sy namono nahafaty azy avy eo, araka ny angom-baovao natao halina. Efa nisy ihany ny fampandrian-tany nataon’ny zandary tany amina faritra maro tany Betroka ary efa somary nilamina, saingy ankehitriny dia mirongatra indray ny asan-dahalo ary miaraka amin’ny fitaovam-piadiana mahery vaika hatrany ireo malaso amin’izany.

RTT