Fandriampahalemana

Gadra nanafika tao Ambohiborona Lehiben’ny fonja roa nesorina tamin’ny asany

Fandriampahalemana
Alarobia 23 Desambra 2020

Mivoatra ny toe-draharaha taorian’ilay fanafihana mitam-basy niharo doro trano ka

nahafatesana olona miisa sivy mianaka tao Ankidaondrano Kaominina Ambohiborona, Distrikan’i Faratsiho, Faritra Vakinankaratra ny alin’ny 18 desambra 2020. Voalaza tamin’izany fa gadra tokony mamita sazy any am-ponja Antsirabe ny roa tamin’ireo nahavanona ity heloka bevava ity. Sady tsy tao amin’ny fonjan’Antsirabe no tsy tany amin’ny fonja fanarenana “camp pénal” Mahandraza, voalaza fa nandefasana azy, ihany koa ireo ahiahiana ho isan’ireo nahavanon-doza, tamin’ny fotoana nanaovan’ny Zandary fitsirihana fanamarinana. Nifatratra any amin’ny fandraharahana ny fonja ny rihitra. Ny talata 22 desambra 2020 dia nilaza fa efa nandray fanapahan-kevitra ny Tale jeneralin'ny fandraharahana ny fonja Ranaivo Andriamaroahina Tovonjanahary ka nampiato avy hatrany tamin’ny asany ny lehiben’ny fonja Antsirabe sy ny lehiben’ny “camp pénal” Mahandraza. Nambarany fa nanokatra fanadihadiana ara-pitantanana ihany koa ny fandraharahana ny fonja hamantarana ny lesoka fototr’izao goragora izao sy izay tompon’antoka amin’izany.

Jean D.