Fandriampahalemana

Fokontanin’i Tsiadana Vahiny ireo nanafika ny tanàna, hoy ny sefom-pokontany

Fandriampahalemana
Alarobia 23 Aogositra 2017

Manao sesilany ny fanafihan-jiolahy eto Antananarivo Renivohitra. Ho an’ny fokontany Tsiadana manokana ao anatin’ny Boriborintany faharoa

izay vao lasibatry ny asan-jiolahy afaka omaly alatsinainy hariva dia hatao peta-drindrina isaky ny faritra manomboka izao ny laharam-pinday hiantsoana ny sefom-pokontany sy ny mpitandro ny filaminana, raha araka ny fanazavan’Atoa Solohery Ravelomanantsoa sefom-pokontany ao an-toerana. Ny mba hahafahana mandray andraikitra avy hatrany ny tanjona fa tsy hiandry olona maratra sy vola very tahaka ireny vao hihetsika. Nomarihiny manokana moa fa efa nisy ihany ny fanentanana natao tamin’ny mponina saingy adinon’ireto farany rehefa sendra ny tsy ampoizina izy ireo. Olona vahiny ihany koa ireo nanafika tao amin’ny fokontany iadidiany fa tsy mponina ao an-toerana. Efa voahefy tsara mantsy ny fandriampahalemana ao amin’izy ireo. Raha tsiahivina, trano fivarotana mpambongady iray no lasibatra ka maty voatifitra teo amin’ny tratrany ny tompon-trano ary lasan’ireo tsy mataho-tody ny vola mitentina 4 tapitrisa Ar. Olona roa no mbola miandry ny fandidiana hanalana ny bala tafiditra ao amin’ny vatany etsy amin’ny hopitaly HJRA ankehitriny ka anisan’izay ilay lehilahy voa teo amin’ny sandriny raha efa nalefa nody kosa ilay ankizy vao 12 taona monja lasibatra.

Pati