Fandriampahalemana

Partagé sur :
• facebook

Basy 493 no natolotry ny Lehiben’ny Etamazaoron’ireo Tafika, ny Jeneraly Sahivelo Lala Monja Delphin, ny Fitaleavan’ ny Fanompoam-pirenena sy fiandry omaly 15 desambra teny Andohalo.

 Azo tamin’ny hetsika fampandriana fahalemana nataon’ny Etamazaoron’ireo Tafika sy naterin'ireo olona an-tsitrapo ireo basy ireo, ka tafiditra ao anatin’ny hetsika "iray volan’ny famotsoran-keloka amin’ny fitazomana basy tsy ara-dalàna" ny 16 novambra-15 desambra, natao hamongorona ny fiparitrahan’ny fitaovam-piadiana tsy ara-dalàna, hoy ny Minisiteran’ny fiarovam-pirenena. Ny faritra Bongolava, Melaky, Tsiribihina no nahitana basy tsy ara-dalàna betsaka indrindra. Misy ny basy mahery vaika, misy basy vita gasy maro, basim-borona, grenady 6, cartouche-na bala 50 eo,... Tsy misy avy any amin’ny tafika ireo raha ny fanamarihana. Hojerena manokana ny tena fihavian’ireo basy vita gasy hoe: aiza ny fototra? Nanome voninahitra ny fotoana ny Talen’ny Kabinetra eo anivon’ny Minisiteran’ny Fiarovam-pirenena, ny Jeneraly RajaonarivonY Alexandre, izay nankasitraka izao vokatra izao. Hatreto dia mitôtaly 610 ireo basy tsy ara-dalàna voaangona manerana ny Nosy ary miitatra hatramin’ny 30 desambra ny fe-potoana ahafahana manatitra ny basy tsy ara-dalàna. Tsy misy arakaraka na fanasaziana ny fanaterana an-tsitrapo ny basy mandra-pahatongan’io fotoana io. Aorian’izao kosa dia hisy ny baiko hisafoana sy hitadiavana hatrany ifotony ny olona mitazona basy. Maro ny ambana, mivoatra ny fitaovana sy paikady entin’ny mpanao ratsy, ka mivoatra tahaka izany ihany koa ny an’ny foloalindahy.
Toky R
 

Tia Tanindrazana

Samia mijoro ho an'i Gasikara.