Fisamborana noho ny afera

«Kidnapping »

Fandriampahalemana
Alakamisy 21 Desambra 2023

Olom-boafidy 2, mpitandro filaminana 9, sivily 5

Olom-boafidy 2, mpitandro ny filaminana 9, sivily miisa 5 no voasambotra tamin’ny raharaha fakana an-keriny na « kidnapping» ao amin’ny distrikan’Ankazobe sy Anjozobe, raha ny tatitra nataon’ny mpitandro ny filaminana. Nandray anjara tamin’ny asa ratsy na tamin’ny asa fanafihana mivantana, na fampitaovana,… izy ireo. Nambara fa efa fantatra ireo atidoha, ary mandeha ny fikarohana. Raha hiverenenana, ny 13 desambra lasa teo no nanaovan’ny mpitandro filaminana tatitra fa dahalo miisa 3 no lavon'ny mpitandro filaminana, roa hafa kosa naratra mafy raha tafatsoaka ny namany sasany. Basimborona miisa roa no tavela, miaraka amin'ny bala efa nipoaka miisa 17, miaraka amin'ny mohara sy tavoahangy feno ody ratsy. Tamin’io, dia miisa 8 ireo takalon’aina, saingy efa roa sisa satria votsotra ny 6 raha ny tatitra omaly. Ny 4 desambra no nanomboka ny hetsika fampandriana fahalemana. Ny sasany tamin’ireo 6 votsotra, dia ny 2 tafavoaka voalohany no nandoa vola ny fianankaviany fa ny ambiny dia vokatry ny tsindry nataon’ny mpitandro filaminana, ny fokonolona, ny olom-boafidy, raha ny fanazavana nentin’ny mpitandro filaminana tamin’ny alalan’ny Kolonely Tojo Raoilijon Kaomandin’ny Vondron-tobin’ny zandarimaria Analamanga.
Nangonin’i Toky R