Fandriampahalemana

Partagé sur :
• facebook

Kisendrasendra teny an-dalam-be no nahazoan’ny zandary vaovao fa nisy gadra nitsoaka tao amin'ny fonjan'Antanimora ny alin'ny 10 hifoha 11 febroary 2018, ka nanamarinana izany teny an-toerana. Nandefa iraka mba ahafahana mandray ny fepetra izy na dia efa somary tara ihany aza izany, hoy ny fanambarana omaly.

Omaly 11 febroary 2018 tokony ho tamin’ny 11 ora atoandro, rehefa nanantona ny tompon'andraikitra tao amin'io fonja io ny lefitry ny komandin'ny borigady Betongolo, dia nilaza izy fa nisy tokoa ireo gadra nandositra, saingy tsy mbola afaka nanome ny mombamomba ireo gadra izy ireo satria mbola mivory momba izany, fa homena ihany ny mpitandro ny filaminana rehefa vita. Tokony ho tamin'ny 2 ora tolakandro, dia naterin'ny iraka avy any amin'ny fonja teny amin'ny zandarimaria ny mombamomba ireo gadra. Raha ny tokony ho izy dia vao mahafantatra ny fandosirana ny tompon'andraikitra eny amin'ny fonja dia efa milaza haingana amin'ireo tobin'ny Hery rehetra akaiky azy ny zava-mitranga sy ny mombamomba ny gadra nandositra mba ahafahana eo noho eo ihany manao ny fanenjehana sy fanakanana, hoy ny zandary. Manaraka ho azy aoriana ny fanaovana ny “avis de recherche”, izay "formalités" na fombamba an-taratasy fotsiny. Tamin’ny fandosiran’ny gadra 5 ny alin’ny 7 oktobra 2017, dia efa ny takarivan’ny ampitson’iny vao fantatry ny zandary izany. Nanome tsiny mpiandry fonja izy ireo noho izay fomba fiasa sy ankinafinafina izay, saingy miverina indray izany. Misy isaky ny alina ny fisafoana ataon'ireo mpitandro ny filaminana ankoatra ireo "piquet" izay fiandry afaka manampy raha ilaina indrindra moa amin'ny trangana "évasion" toa izao, hoy ny zandary.

Toky R

Tia Tanindrazana

Samia mijoro ho an'i Gasikara.