Fandriampahalemana

Partagé sur :
• facebook

Namoaka ny antontan’isa mikasika ireo vokatra azon’ny avy eo anivon’ny zandarimariam-pirenena nanomboka ny janoary teo ka hatramin’ny omaly alaronia 20 septambra ny fiadidiana ity sampan-draharaham-pitandroana ny filaminana ity.

  Nanamafy hatrany ny sekreteram-panjakana miadidy ny zandarimariam-pirenena ny jeneraly Randriamahavalisoa Girard, hoy ny fanambarana fa tsy mifidy galona ny fanasaziana izay mihoa-pefy. Porofo dia 16 hatreto ireo zandary voaroaka noho ny tsy fanarahana fitsipika, 25 no voatazona am-ponja ary misy manamboninahitra tafiditra ao anatiny. 127 ireo atao famotorana noho ny fandikan-dalàna na fandikana fitsipi-pifehezana ary mbola misy manamboninahitra ihany koa. Ampahany amin’ireo vokatra azo ny fiverenan’ny omby miisa 100 an’ny ben’ny tanànan’ny kaominin’i Manambina, distrikan’i Miandrivazo, rehefa notafihana dahalo 60 lahy mirongo basim-borona 30 sy basy marovava 1 ny 15 septambra teo. Ao anatin’ny ezaka hiadiana amin’ny famotsiana omby halatra ihany koa dia tao anatin’ny ombim-barotra 158 nosavaina teny amin’ny lalam-pirenena fahafito dia 135 no tratra tsy nisy kavina ka nogiazana avy hatrany. Saron’ny zandary tao Betroka koa ny 9 septambra teo ny tambajotrana mpanamboatra bala ho an’ny dahalo izay vovoka simika Chlorate de sodium 200kg ka nisamborana olona 8 izay dahalo ny 3 amin’izy ireo. Manentana ny rehetra ny zandary mba hiara-kisalahy amin’ny ady amin’ny tsy fandriampahalemana.

J. Mirija

Tia Tanindrazana

Samia mijoro ho an'i Gasikara.