Fandriampahalemana

Fanafihana teny Tsiadana Olona teo an-tanàna ihany no nanampy ireo olon-dratsy

Fandriampahalemana
Alakamisy 07 Mey 2020

Nisy fanafihan-jiolahy mitam-piadiana teny Tsiadana Ankatso ny harivan’ny 06 aprily lasa teo.

Tranom-barotra iray mpivarotra PPN no voatafika tamin’izany ka nahafatesana lehilahy iray izay voatifitry ny basy ary nahaverezana vola mitentina 7 tapitrisa Ar. Tsena efa mihidy no notafihan’ireo jiolahy raha miisa 2 izy ireo no niditra tao an-trano izay nitondra basy PA ny anankiray raha nisy ihany koa ireo niandry teny ivelany. Nametraka fitoriana teny amin’ny polisy misahana ny heloka bevava tetsy Anosy ireo niaram-boina taorian’izany. Nanao ny fanadihadiana ny polisy avy ao amin'ny sakelika fahaefatra ka lehilahy miisa 2 no voasambotra ny alahady teo tokony tamin’ny 6 ora hariva, teny Tsiadana ihany. Tamin’ny famotorana natao no nahafantarana fa ireto lehilahy ireto no niaraka tamin’ireo jiolahy nanafika ity tranom-barotra ity. Marihana fa talohan’ny nidiran’ireto olon-dratsy ireto tao amin’ilay tsena dia izy ireo no nanome vaovao ary nilaza tamin’ireo jiolahy fa azo tafihana ilay tranom-barotra. Izy ireo moa dia mipetraka teo amin’ny manodidina ilay tsena ihany. Tamin’ny fanadihadiana natao tamin’ny tompon’ny tsena ihany koa no nahafantarana fa tsy nisaron-tava ireo jiolahy nanafika tao amin’izy ireo. Mbola eo am-panaovana fanadihadiana sy fikarohana ireo nitondra ilay basy ny mpitandro filaminana raha natolotra ny fampanoavana omaly kosa izy roalahy.

Pati