FANAFIHANA TAO RAMAINANDRO

Tovolahy iray mpanafika matin’ny fokonolona

Fandriampahalemana
Zoma 29 Novambra 2024

Tena tsy mena-mivadika ny olona. Tovolahy namany ihany no nanafika ilay Ramatoa monina ao Ramainandro,

distrikan’i Faratsiho ny alin’ny 26 Novambra teo tokony ho tamin’ny 07 ora hariva. Raha tsiahivina kely ny tantara dia nidiran'ny jiolahy miisa 5 misaron-tava ny tranon'io Ramatoa io tamin’io alina io. Nokapain'izy ireo ny antsy ny omby roa mifatotra tao am-bala. Nopotehiny ny kodiaran-tsarety. Nosimbaina ny varavaran'ny trano fonenan’ilay Ramatoa. Nikasa hiditra an-keriny hitady ilay renim-pianakaviana tompontrano izy ireo taorian’izany saingy efa tafavoaka ny trano haingana ity farany no sady niantso vonjy.Vetivety dia vory ny fokonolona vokatr’izany ka raikitra ny fifanjevoana. Voasambotra nandritra io tranga io ny iray tamin’ireo jiolahy nisaron-tava ka maty daroky ny fokonolona. Raha ny fantatra moa dia efa nanana olana tamin'ity renim-pianakaviana ity io tovolahy namoy ny ainy io. Nisy fananan’io Ramatoa io nopotehiny mantsy ka rehefa tsy nisy fifandaminana dia voatery nitory tany amin'ny zandary ilay Ramatoa simba fananana. Tokony hiatrika fitsarana amin’ny volana Desambra ho avy izao araka izany io tovolahy namoy ny ainy io.
Pati
Legende : Ity ilay dahalo namoy ny ainy sy ireo fananana nopotehiny sy ny namany !