Fandriampahalemana

Fanafihana mpivady tao mahajanga Olona 5 no tratra, tsy ampy taona ny 2

Fandriampahalemana
Zoma 03 Jolay 2020

Jiolahy miisa dimy ary tsy ampy taona ny roa no voasambotry ny polisy miasa ao Mahajanga ny 02 Jolay lasa teo. Raha tsiahivina kely ny tantara dia ny marainan’ny 27 jona lasa teo tamin’ny 1ora no nisy mpivady nirava avy niasa tao Tsararano ambany.

Norobain’ny andian-jatovo miisa dimy mirongo fitaovam-piadiana toy ny antsy sy vato izy ireo. Lasan’ireto olon-dratsy ireto ny firavaka volafotsy maromaro toy ny gourmette, finday, vola 150.000Ar ary ny kojakoja momba azy mivady. Saika niharan’ny fanolanana ilay renim-pianakaviana. Tadidin’ireo niaram-boina anefa ny sasany tamin’ireo olon-dratsy ka tonga nametraka fitoriana teny amin’ny polisy izy ireo. Nandray ny andraikiny avy hatrany ny Polisim-pirenena ao amin’ny kaomisarian’i Mahabibo ka voasambotra ireo olon-dratsy. Rehefa natao ny fanadihadiana dia niaky ny heloka vitany izy ireo, marihana fa ny iray amin’izy ireo dia efa mpamerin-keloka. Efa eny am-pelatanan’ny fitsarana ny raharaha.

Pati