Fandriampahalemana

Fanafihana mitam-basy Miaramila taloha ireo lasa jiolahy

Fandriampahalemana
Alakamisy 06 Septambra 2018

Saron'ny mpitandro ny filaminana ireo jiolahy nanafika tao Ambano-Antsirabe II ny faran'ny herinadro lasa teo. Mpanangom-bokatra sy mpitondra izany aty Antananarivo no nisy nanafika ka vola 1.000.000 Ariary no voaroba.

Nisy tovolahy iray notifirin'ireo jiolahy teo amin'ny tongony mba hanerena ny tompon-trano hamoaka vola. Nandeha ny feo fa nisy mpitandro ny filaminana tafiditra tamin'io fanafihana io ka nanaitra ny hambom-pon'ny namany izany ka niteraka izao vokatra izao. Olona niisa 11 ka vehivavy ny iray tamin'ireo niampy fitaovam-piadiana sy ody gasy maro no tra-tehaka vokatry ny fiaraha-miasan'ny zandary sy ny polisim-pirenena. Nambaran’ireo nisahana ny fanadihadiana fa mbola misy naman'ireo jiolahy ireo karohina ary efa tsy am-perinasa intsony ireo miaramila tratra ireo saingy mbola nampiasa fanamiana sy karatra sandoka maha miaramila. Hatolotra ny fampanoavana ao Antsirabe anio alakamisy ireto jiolahy ireto.

Caius R.