Fandriampahalemana

Fanafihana Cashpoint teny amin'ny 67 Ha Lehilahy roa nalefa eny Tsiafahy

Fandriampahalemana
Alarobia 25 Martsa 2020

Lehilahy miisa 02 no voasambotry ny Polisim-pirenena avy ao amin’ny CSP4 Isotry sy ny Sampan-draharahan’ny Polisy Misahana ny ady heloka bevava sakelika faha-4, ny alakamisy faha 19 martsa teo noho ny resaka fanafihana mitam-piadiana.

Ny faha 30 janoary 2020 teo tokony ho tamin’ny 11 ora sasany alina dia nisy fanafihana mitam-piadiana nataona jiolahy maromaro tsy nisaron-tava nitranga teo amin’ny 67ha. Cash point iray teny an-toerana moa no lasibatra tamin’izany ary vola 7.000.000 ariary sy finday maromaro no very tamin’izany. Nitondra basy PA iray sy antsy lava ireo jiolahy tamin’izany. Manoloana izany dia nanao fanadihadiana avy hatrany ny Polisy, ka fantatra fa olona 3 no nanao ny fanafihana. Ny alakamisy faha 19 martsa teo dia nahazo vaovao ny Polisy mahakasika ireo jiolahy ireo ka dia voasambotra teo Andavamamba ny 2 lahy tokony ho tamin’ny 11 ora sasany atoandro. Rehefa nosavaina izy ireo dia nahatrarana antsy lava iray. Nohamafisin’ny mpitory moa fa izy 2 lahy ireo dia anisan’ny nanafika azy. Rehefa nosavaina ihany koa ny trano fonenan’izy roa lahy dia mbola hita tao ny akanjo nanaovan’izy ireo nandritra ny fanafihana. Niaiky ny helony izy ireo nandritra ny fanadihadiana azy ary nanondro ny namany iray hafa izay manana sy nampiasa ilay basy. Mbola mitohy ny fikarohana ity farany ankehitriny. Naiditra am-ponja vonjimaika eny Tsiafahy izy 2 lahy ireto rehefa avy nandalo fampanoavana ny alatsinainy teo.

Pati