Fampandriana fahalemana

Miova tanteraka ny paikady

Fandriampahalemana
Alarobia 19 Novambra 2025

Miova tanteraka ankehitriny ny paikady

ankapobeny momba ny politika fampandriana fahalemana manerana ny nosy, araka ny fampahafantarana nataon'ny Filohan'ny fanavaozana, hoy ny fampitàm-baovao voaray nivantana tamin'ny fahitalavim-pirenena ny alahady teo. Tsy hisy ny fampahafantarana mialoha ny hetsika fampandrian-tany ataon'ny Hery fiarovana sy fandriampahalemana raha toa ka ny politikan’ny serasera amin'ny haino aman-jery no hita nibahana nandritra izay fotoana izay, mialoha ny tena hetsika hatao. "Raha tianay dia efa manomboka mihitsy ny hetsika vao miteny amin'ny vahoaka malagasy izahay fa efa miparitaka any atsimo any ny miaramila amin'izao, miezaka miady amin'izay tsy fandriampahalemana izay", hoy hatrany ny Filohan'ny fanavaozana. Natomboka any atsimo izy izao. Efa tamin'ny zoma 14 novambra teo ny miaramila no tonga any an-toerana miparitaka manao ny hetsika. Mazava ny tanjona eto dia ny hisian'ny vokatra mivaingana azo tsapain-tanana ary hipaka eo anivon'ny fiarahamonina malagasy ny ezaka fampandriana fahalemana ataon'ireo mpitandro filaminana. Ao anatin'ny asa am-pahanginana, noho izany, ny hanantanterahan’ny mpitandro filaminana ny asany, hoy hatrany ny fampitàm-baovao voaray.
Nangonin’i J. Mirija