Fandriampahalemana

Famoahana vary 44 taonina an-tsokosoko Lehilahy 6 no voasambotra tany Toamasina

Fandriampahalemana
Talata 22 Septambra 2020

Lehilahy miisa enina sy mpiambina amina orinasa iray, no tra-tehaky ny Polisy miasa ao amin’ny kaomisarian’ny Boriboritany voalohany Toamasina ny 20 Septambra raha nikasa hamoaka an-tsokosoko vary milanja 44 taonina avy amina toeram-pitahirizan’entana (entrepôt) iray tao Tanandava Toamasina.

Tratran’ireo polisy ambodiomby ireto jiolahy ireto namoaka vary fotsy amin’ny gony avy tao amin’ity trano fitehirizan’entana ity ary nitatitra izany tao anaty kamiao lehibe miisa roa. Fantatra fa ilay mpiambina ity toerana ity ihany no niray tsikombakomba tamin’ireto jiolahy ireto ary nampiditra azy ireo tao amin’ilay toerana. Nentina namonjy ny biraon’ny polisy avy hatrany moa izy ireo natao fanadihadiana. Ireo vary 44 taonina dia naverina avy hatrany any amin’ny tompon’ilay orinasa .

Pati