Fandriampahalemana

FAMAKIANA FIARA SY HALATRA KOJAKOJA Tovolahy iray tratra teny Ankadifotsy Befelatanana

Fandriampahalemana
Alarobia 10 Aogositra 2022

Tovolahy iray 23 taona no tratra teny Ankadifotsy Befelatanana rehefa namaky fiara sy nangalatra kojakojam-piarakodia.

Ny alin’ny Alahady hifoha alatsinainy teo no nahatrarana azy io rehefa nanao ny asa fisafoana ny polisy miasa ao amin’ny CSP3 ka nandalo toeram-piantsonana sy fametrahana fiara iray teny amin’ny manodidina. Tao anaty maizimaizina tsy misy mpahita no nahenoana feona fiara misy manakatona ny varavarany, kanefa tsy misy jiro mirehitra. Nanantona ilay fiara ny Polisy ka inona tokoa, fiara iray no efa voapitsoka ny varavarany no hita tao. Tratra tao anatiny ny tovolahy iray teo am-pamakiana fiara. Eo am-pikirakirana ny « auto-radio » ity farany no izao tratra izao, ary tsy manana lakilen’ny fiara akory izy rehefa nanontaniana. Nentina avy hatrany tany amin’ny birao izy, araka izany nanaovana fanadihadiana. Tamin’ny fanadihadiana no nahafantarana fa efa mpanao io asa ratsiny io izy ary amin’ny alina foana no matetika hanatanterahany izany. Na izany aza tsy nisy na inona na inona azony tamin’ny famakiana ity fiara ity . Natolotra ny fampanoavana omaly ny anaolahy ary naiditra am-ponja vonjimaika.
Nangonin’i Pati