Fandriampahalemana

Fakana an-keriny mirongatra Efa misy fiara sy olona araha-maso

Fandriampahalemana
Zoma 03 Jona 2022

Manoloana ny raharaha fakana an-keriny tovovavy nirongatra tato ho ato dia nanao fanambarana omaly ny teo anivon’ny polisim-pirenena fa misy ny fepetra maromaro ho raisain’izy ireo.

Efa misokatra ny fanadihadiana ifandrimbonan’ireo rantsana manokana eo anivon’ny borigady misahana heloka bevava, ny polisy misahana ny zaza tsy ampy taona, ny sampan-draharaha misahana ny heloka ana habaka, borigady misahana ny zava-maha domelina ary ny polisy an-tanan-dehibe. Namafisina ireo fepetra efa noraisina eo anivon’ireo toeram-pianarana eto an-drenivohitra iaraha-miasa amin’ny CISCO. Ho hamafisina koa ny fisafoana eny amin’ireny toerana mahavory olona sy be olona ireny, indrindra, ny faritra ivoahana sy idirana eto an-drenivohitra. Miantso ny ray aman-dreny sy vahoaka ho tony sy tsy hisalasala hanome ny angom-baovao na fiara mampiahiahy io na olona mampiahiahy. Mahakasika ireo tranga miisa 2 niseho tamin’ity herinandro ity dia efa misy fiara sy olona araha-maso mampiahiahy ary eo am-pikarohana izahay ankehitriny. Antsoy ny 0202228170 ahafahana misambotra ireo olona manakorontana saim-bahoaka ireo, hoy hatrany ny fanambarana.
J. Mirija
Legende: Efa manadihady mba hamantarana ny tena marina ny polisim-pirenena