Fandriampahalemana

Partagé sur :
• facebook

Fandrika efa nahafatesana mpanao afera maromaro no misy any Miandrivazo, hoy ireo mpisehatra mpandraharaha madinika amin’ny harena an-kibon’ny tany maro indrindra ny avy aty an-drenivohitra, ka mahatofoka azy ireo tanteraka hatramin’ny namonoan’olona ny “légionnaire”

Malagasy iray  nidina tany an-toerana hividy merkiora ny 12 desambra 2017 teo. Mody misy mpanera avy any Miandrivazo, mampilendalenda ny mpanera avy aty an-drenivohitra ka milaza ny fisiana entana lafo vidy toy ny merkiora sy vatosoa. Mitady izay mpanam-bola mpiara-miasa aminy kosa ireto farany, hoentina any mba hahazoana ny tamberim-bidy ifanarahana. Efa misy tetika maty paika hamandrihana azy ireo anefa any an-toerana ka voaroba hatrany izay tonga any ary lazaina fa notafihin’ny dahalo. Nampitombona ny ahiahin’ireo mpanao afera amn’ny fisian’ny manampahefana any an-toerana mitsikombakomba ao anatin’izao raharaha maizina izao ny nahafatesan’io “legionnaire” Malagasy voalaza teo io. Notsenain’ny mpanera tany an-toerana teo amin’ny  fokontany Ambalakida, kaominin’ Ankotrofotsy, distrikan’i Miandrivazo, eo amin’ny  RN34, izy sy ilay mpanera vavy sy lahy niara-dia taminy avy aty Antananarivo. Notarihina nandeha an-tongotra avy eo ka nisy nanafika rehefa tratra hariva teny an-dalana. Vokany : maty ilay “legionnaire”e ary lasa ny volany nitentina 5 tapitrisa ariary mahery nefa tsy nisy naka ny basiny. Najanona tany Ambalakida, nampiandrasina fiara ilay vehivavy fa naka mpitari-dalana tao ilay mpanera avy any Miandrivazo. Nisy nanongotra koa ny kojakoja lafo vidy (calculateur) tao amin’ny fiarany ka ninoan’ny namany fa tsy dahalo no hahavita izany.

Efa voasambotry ny zandary ao amin’ny brigade Ambatolahy ny ahiana ho tomponantoka tamin’izao raharaha izao saingy mipetraka hatrany ny ahiahin’ny mpibizina amin’ny fisian’ny manampahefana ao an-damosin’izy ireo matoa tsy nisy tohiny ny momba ireo rehetra ireo voa teo alohany. Nomarihin’ny fianakaviany fa mety hitohy lavitra ity raharaha ity satria mizaka ny zom-pirenena frantsay io miaramila io ary ao anaty fotoana ialany sasatra (permission) ara-dalàna amin’izao fotoana izao.

Ntsoavina Evariste

Tia Tanindrazana

Samia mijoro ho an'i Gasikara.