Fandriampahalemana

Distrika fito sokajiana ho faritra mena Misy hetsika manokana momba ny fandriampahalemana

Fandriampahalemana
Alatsinainy 04 Septambra 2017

Nanao bemidina tany amin’ny faritra Atsimo Atsinanana ny fianankaviam-ben’ny Zandarimariam-pirenena notarihan’ny jeneraly Tsirivelo Nicolas

, talen’ny kabinetran’ny sekreteram-panjakana miadidy ny Zandarimariam-pirenena sy ny jeneraly Rakotoarison Anthonny, talen’ny fanangonam-baovao sy ny filaminana eo anivon’ny foibe fibaikoana ny 30 aogositra 2017. Hametraka ny paikady hamerenana sy hifehezana ny filaminanana any Atsimo Andrefana, Atsimo Atsinanana ary Anosy no tarigetran’izy ireo amin’izao hetsika izao, araka ny toromarika avy amin’ny sekreteram-panjakana miadidy azy io. Nisy ny dinika niarahana tamin’ireo vahoaka tany an-toerana sy ireo manampahefana nijerena ireo fomba iaraha-miasa hamongorana ny tsy fandriampahalemana. Niantso ny vahoaka ny zandary mba hanome vaovao na mikasika ny tsy fandriampahalemana na amin’ny fitondrantenan’ireo zandary mba hiaraha-mientana amin’ny fanarenana ny firenena. Marihina fa distrika fito sokajiana ho faritra mena no hanaovana ny hetsika amin’izao dingana voalohany izao dia ny distrikan’i Vangaindrano, Sakaraha, Mandoto, Tsaratanàna, Andapa, Ambohimahasoa ary Morafenobe, ka hitohy manerana an’i Madagasikara.

Nangonin’i Jean D.