Fandriampahalemana

Dilàna Morarano Chrome Ataon’ny jiolahy fahirano

Fandriampahalemana
Talata 13 Jona 2017

In-tsivy sahady izay ny jiolahy no nandravarava ny tanàna ao Dilàna fokontany Andoharano kaominina Morarano Chrome.

Ny sabotsy alina teo tokony ho tamin’ny 12 ora sy sasany, dahalo telo mirongo fitaovam-piadiana toy ny basy, famaky ary antsy lava lela no nanafika tokantrano iray. Tsy nihambahamba ireo jiolahy fa avy hatrany dia namira ilay rangahy tamin’ny famaky ary notsatohany antsy ny tendany. Ilay renim-pianakaviana kosa nodarohan’izy ireo vody basy. Fantatra fa vola 20.000 ariary no nalain’ireo jiolahy tamin’io tokantrano io. Manao antso avo amin’ny tompon’andraikitra isan’ambaratongany ny sefom-pokotany any an-toerana mba hamahana io olan’ny tsy fandriampahalemana io satria zary miraviravy tanana ny vahoaka ka tsy afaka ny hamokatra. Tiana ny mampahafantatra fa 23 km miala ny renivohitry ny kaominina morarano no misy an’i Dilàna io izay azo ambara fa tany lavitra andriana ka manararaotra ny jiolahy. Hetahetan’ny sefom-pokontany sy ny vahoaka any an-toerana ny hametrahana miaramila hiandraikitra ny filaminana any amin’izy ireo.

Niry A