Fandriampahalemana

Depioten’i Soalala Said Zakaniaina Lehilahy roa nitondra basy no saika hamono azy

Fandriampahalemana
Talata 30 Jolay 2019

Vao nivoaka ny haino aman-jery tsy miankina Viva tao Mahajanga ny Depiote Said Zakaniaina Mahafaly Joseph voafidy tao Soalala ny alahady lasa teo no nisy jiolahy roa nanaraka tsy nisaron-tava ary nitam-basy nikasa hifofo ny ainy.

Nivahiny tao amin’io radio tsy miankina io izy tokony ho tamin’ny 10h30 atoandro tamin’io fotoana io, saingy niseho ny zavatra tsy nampoizina. Afa-niala io depiote io, ary afaka nanaitra ny manodidina. Raikitra ny fifanenjehana saingy tafatsoaka ireo jiolahy ireo. Tsy fantatra mazava na lonilony politika no saika hifofoana ny ainy na asan-jiolahy tahaka ny asan-jiolahy mitam-piadiana rehetra. Efa mandeha ny fanadihadiana mikasika io toe-draharaha hafahafa io, raha ny fampitam-baovao. Marihina moa fa depiote lany tamin’ny anaran’ny lisitra tsy miankina Atoa Said Zakaniaina Mahafaly Joseph.

Toky R