Fandriampahalemana

Dahalo nanafika CEG Ny tale maty voakapa famaky, ny vola lasa

Fandriampahalemana
Alarobia 04 Oktobra 2017

Tsy mialamina intsony ny tany ! Notafihin’ny andian-dahalo indray ny talen’ny CEG any alarobia-Bemaha, ny alin’ny alatsinainy 2 oktobra 2017 lasa teo.

Maty vokatry ny fira famaky nahazo ny lohany ity mpiasam-panjakana ity na dia saika hovonjena tany Ambositra aza. Araka ny loharanom-baovao avy tamin’ny mpiara-miasa taminy dia tokony ho tamin’ny 12 ora alina no tonga ireo andian-dahalo ka avy hatrany dia tsy nisy resaka fa ny vola saram-pisoratan’anaran’ny mpianatra no notadiavin’ireo dahalo ary tsy namelany raha tsy azony. Voalaza fa an-tapitrisany ihany ireo vola ireo satria mizara roa ny CEG dia ny ao amin’ny fokontany Ambohibary sy ny eo Alarobia, izay samy eo ambany fiadidiany. Tsy nionona tamin’izay ireo dahalo fa noraofiny ihany koa ny fitaovana tao an-tokantranon’ilay mpampianatra toy ny fahitalavitra sy ny kojakoja isan-karazany. Raha ny fantatra dia nisy naratra ihany koa ny zanak’ity tompon’andraikitra ity, saingy tsy misy atahorana ny ainy. Efa nentin’ny fianakaviny nody any Anjanampara-Betafo ny razana satria teny an-dalana hamonjy toeram-pitsaboana no nahafaty azy. Tapi-dalan-kaleha tanteraka ny Malagasy fa sady miady amin’ny tsy fandriampahalemana no miady amin’ny pesta ihany koa.

Caius R