Fandriampahalemana

Brickaville Mpangalatra taolam-paty 5 lahy no tratra

Fandriampahalemana
Alarobia 07 Desambra 2022

Lehilahy miisa 05 indray no saron'ny zandary avy ao amin'ny Poste Avancé Antsampanana distrikan'i Brickaville afak’omaly alatsinainy 05 desambra tokony tamin'ny 11 ora maraina rehefa nangalatra taolam-paty.

Loharanom-baovao avy amin'ny olona tsara sitrapo no nahazoana vokatra. Fiara mpitatitra iray mampitohy an'i Mahanoro sy Toamasina no nahatrarana ireo taolam-paty ireo. Natao tao anatina gony dimy ireto farany izao mody nasiana "charbon" sy valizy 02 samy efa feno taolam-paty avokoa. Miisa 397 kosa ireo taolam-paty natao tao ambonin’ny tafon'ilay fiara. Tany amin’ny distrikan’i Nosy Varika tany moa raha araka ny fantatra no nitrangana vaky fasana. Saika hoentina any amin’ny kaominina ambanivohitra Ampasimadinika-Toamasina II, araka izany ireto taolam-paty ireto no izao tra-tehaka izao.Voatery notazonina niaraka tamin'izy dimy lahy mpangalatra taolam-paty ireto araka izany ny mpamilin’ilay fiara sy mpanampy azy, ary nentina nankany amin'ny "Compagnie territoriale de la gendarmerie" Toamasina natao famotorana lalindalina kokoa.
Nangonin’i Pati
Legende : Ireto ireo taolam-paty tratra