Fandriampahalemana

Betafo Vakinankaratra Nohamafisina ny ady amin’ny tsy fandriampahalemana

Fandriampahalemana
Alarobia 09 Septambra 2020

Sesilany ny fitarainan’ny vahoaka ao Betafo Vakinankaratra manoloana ny firongatry ny tsy fandriampahalemana ao an-tanàna sy amin’ireo Fokontany manodidina.

Halabotry, vaky trano ary manomboka miseho ihany koa ny halatr’omby. Ny tsy fisian’asa nateraky ny fihibohana efa dimy volana izay, no anisany miteraka tsy fandriampahalemana hoy ny Ben’ny tanànan’ny Kaominina ambonivohitr’i Betafo, Randriatahinamalala Livasoa. Nandray ny andraikiny ity farany ka namory ireo tompon’andraikitra misahana ny filaminana ao an-toerana ahitana Polisy, Zandary ary ireo kartie mobila ary ny sefom-pokontany ny zoma 4 septambra teo. Niaiky ny rehetra fa samy tompon’andraikitra amin’ny ady amin’ny tsy fandriampahalemana. Tapaka fa hamafisina ny andrimasom-pokonolona isaky ny Fokontany, haverina indray ny fampiasana ny bokim-bahiny izay apetraka any amin’ny Vaomieran’ny Fokonolona, hamafisina ny fisafoana ataon’ny mpitandro filaminana amin’ny alina. Hamafisana ny tsy fahafahana mivezivezy amin’ny alina manomboka amin’ny 9 ora alina ka hatramin’ny 2ora maraina. Toy izany koa ny fanajana ny fepetra ara-pahasalamana satria mbola ao anatin’ny hamehana ara-pahasalamana amin’izao fotoana izao.

Jean D.