Fandriampahalemana

Ben’ny tanàna handray fahefana Notafihina tao anaty hotely

Fandriampahalemana
Zoma 17 Janoary 2020

Hamonjy fivoriana mikasika ny famindram-pahefana ny Ben'ny tanànan'ny kaominina ambanivohitra Andrimbavontsona, distrika Analalava Atoa Rabezato Julio sy ny lefiny Gilbert, voafidy tamin'ny anaran'ny MAMITA.

Nandry tamin'ny hotely tao Antsohihy izy ireo. Nisy lehilahy miisa 3 niditra an-keriny anefa tao amin'ny hotely, ka nandratra ny mpiandry ny toerana ary niditra tao amin'ny efitra nandrian'ny Ben'ny tanàna sy ny lefiny. Nivatsy antsy sy hazo izy ireo, ka dia niezaka ny namono sy nikendry ny lohan'ireto olom-boafidy ireto. Raikitra ny sakoroka, lavo izy mirahalahy satria tratra tamin'ny lohany. Mody naka entana kely ireto mpanafika ireto, asa hanakonana ny tena anton'izao fanafihana izao, hoy ny fampitam-baovao. Tsaboina ao amin'ny hopitaly ao Antsohihy izy telo lahy ireo amin’izao fotoana izao. Ahiana ho ambadika politika avo lenta ity toe-javatra ity.

Toky R