Fandriampahalemana

Bejofo-Ambatondrazaka Rangahy avy namonjy sasak’alina, maty voafira antsy

Fandriampahalemana
Alarobia 27 Desambra 2017

Hivavaka, hitsena ny Mpamonjy no nivoahana ny trano, fahafatesana no nitsena. Nidiram-pahoriana tampoka ny fianakaviana iray ao Bejofo, Distrikan’Ambatondrazaka ny alin’ny 24 desambra teo. Namonjy Fiangonana nankalaza ny fahaterahan’ny mpamonjy izy mianakavy kely.

Nanapa-kevitra ny hialoha lalana, hamonjy fodiana ilay raim-pianakaviana, noho ny tsy fandriampahalemana. Ny vady aman-janany mbola tany am-piangonana. Loza no niseho, fa dia efa tafiditra tao an-trano ny jiolahy tamin’ny fotoana nahatongavan’ilay rangahy. Tsy nisy alaharo fa dia voafira antsy ilay tompon-trano. Lehibe ny fahavoazana ary nitarika tamin’ny fahafatesany avy hatrany noho ny fahaverezan-dra be loatra. Tsy vitan’izay fa mbola narian’ireo jiolahy teo ivelan’ny trano, toerana fametrahana mololo ny vatana mangatsiakan’ilay rangahy. Mbola notafihin’ireo jiolahy io alina io ihany koa ny tokantranon’ny zanak’ilay rangahy namoy ny ainy, trano tsy dia mifanalavitra amin’ny an’itsy voalohany. Tsy nisy aina nafoy tao, fa ny fananana no very. Misokatra ny fanadihadiana sy ny fikarohana ireo olon-dratsy.

Nangonin’i Jean D.