AVARATR'IALASORA FANDRIANA

Renim-pianakaviana hita faty tao anaty dobo

Fandriampahalemana
Alatsinainy 09 Oktobra 2023

Renim-pianakaviana iray manodidina ny 39 taona eo ho eo omaly Alahady 08 Oktobra atoandro no hita faty tao

amin’ny dobon'ny mpianatra ao amin'ny Fokontany Avaratr' Ialasora, distrikan’i Fandriana. Olona teo amin'ny manodidina ihany no nahita ny razana izay mbola tao anaty rano, raha araka ny vaovao azo. Nampandre ny mpitandro ny filaminana sy ny mpitsabo tao Fandriana avy hatrany ny fokonolona nizaha ny razana. Raha araka ny fantatra dia efa niboridana ny tapany ambany tamin-dRatompokovavy, nisy faroratra nivoaka ny vavany ary misarita-bolo izy. Tsy nahitàna dian-kapoka kosa ny vatany. Ahiahian'ny mpitsabo ny mety nisian'ny fanapoizinana sy fanolanana nanjo ity vehivavy ity. Marihana fa manan-janaka roa Ratompokovavy. Efa eo am-pelatanan'ny mpitandro ny filaminana ny raharaha koa andrasana izay mety ho tohiny.
Pati
Legende : Tahaka izao ny nanjo an-dRatompokovavy !