ASA FANAMBOARANA LALAMBE

Olona 3 mpangalatra solika tratra

Fandriampahalemana
Alakamisy 11 Septambra 2025

Olona miisa telo no voasambotry ny Polisin'ny FIP avy ao Anjozorobe

nandritra ilay trangana halatra solika amin’ny tetikasa lalambe mikodana tao Mangamila, distrikan’Anjozorobe. Ny alin’ny 05 Septambra teo nandritra ny fisafoana no nahatrarana ny lehilahy miisa roa avy ao Antanetibe. Tratra niaraka tamin’ny daba mavo miisa 03 feno solika izy roa lahy ireo. Fantatra fa nangalarina tao amin’ny tobin'ireo mpiasa ao amin'ny fanamboarana ny lalambe migodana ao Mangamila ireo solika. Rehefa natao ny fanadihadiana, dia nanonona ny mpiray tsikombakomba aminy izy roalahy, izay vadin’ny iray tamin’ireo voasambotra ihany, sady mpitahiry ireo solika nangalarina. Ny marainan’ny 06 Septambra teo dia voasambotra ihany koa ilay vehivavy 36 taona izay mpitahiry sy mpamindra ilay lasantsy. Fantatra fa mbola misy mpiray tsikombakomba an'ireto mpangalatra solika ireto karohina. Solika miisa 48 daba mavo no efa azon'izy ireo, raha tsiahivina. Hoatolotra ny fampanoavana tsy ho ela izy 3 mianadahy.
Pati
Légende : Ireto izy 3 mianadahy !