Fandriampahalemana

ANTOHOMADINIKA Tratra i Benaivo sy i Safidy, mpanendaka ikoizana

Fandriampahalemana
Zoma 17 Mey 2019

Tratran’ny polisy avy ao amin’ny CSP4, ny alarobia 15 mey lasa teo tokony ho tamin’ny 5 ora hariva, teny Antohomadinika i Benaivo sy i Safidy anisan’ireo mpanendaka tena hikoizan’ny mponina eny an-toerana.

Araka ny fantatra, mpanendaka efa tratra saingy tafatsoaka teo am-pelatanan’ny mpitandro ny filaminana i Safidy sady efa nigadra. Tsy afa-nikofoka intsony izy tamin’ity indray mitoraka ity taorian’ny angom-baovao azon’ny polisy. Nahare tamin’ireo tsara sitrapo ireto farany fa mihaodihaody mitady haza eny amin’ny toby fiantsonan’ny taksibrosy mihazo an’Ambatondrazaka eny Antohomadinika izy roalahy ka nanao fisafoana moramora ny mpitandro ny filaminana. Tena tratra ambodiomby saika hanao ny asa ratsiny mihitsy izy ireo ka tsy afa-nihetsika intsony. Anisan’ny voasokajy ao anatin’ny faritra mena ny tanànan’Antohomadinika ankehitriny ka ilana fitandremana fatratra. Hatolotra ny fampanoavana tsy ho ela izy roalahy.

Pati