Fandriampahalemana

Antanety Miarinarivo II Nodoran’ny jiolahy ny tanana, lasa avokoa ny omby

Fandriampahalemana
Alatsinainy 17 Aprily 2023

Mirongatra ny asan-jiolahy any amin’ny distrikan’i Miarinarivo. Jiolahy tsy latsaky ny 10 no fantatra fa niditra an-keriny

tao Mandrosoarivo sy Fenoarivokely, samy ao anatin'ny fokontany Antanety, kaominina ambanivohitra Miarinarivo II omaly maraina tokony ho tamin’ny 06 ora sy sasany. Nanapoaka basy sy nandoro ny trano avy hatrany izy ireo raha vantany vao niditra ny tanàna. Ny sasany koa namoaka ny omby tao am-bala izay fantatra ihany koa fa maromaro. Naharitra ora roa ireo dahalo no nanjaka tao amin’io tanana io raha araka ny nambaran'ireo tantsaha mpamokatra ao an-toerana hatrany. Tamin'ny 8 ora sy sasany maraina ireto farany vao afaka nampandre nihetsika sy niantso ny manodidina saingy efa lasa ireo dahalo. Efa nisy moa ny fampahafantarana ny kaompanian’ny zandarimariam-pirenena ao Miarinarivo nandritra izany narahina fanentanana ireo vatan-dehilahy rehetra mba hanao ny fanarahan-dia hahafahana manavotra ireo fananana kely sisa tavela. Very fanahy mbola velona tanteraka ireo tantsaha any an-toerana noho izany. Miezaka ny miompy sy mamboly hatrany mantsy izy ireo nefa raofin’ny dahalo ao anatin’ny indray mipy maso izany.
Nangonin’i Pati
Legende : Tahaka izao no nihafaran’ilay tanàna avy nodoran’ny jiolahy