ANOSIALA ANDAKANA

Mihoatra ny 10 ireo jiro amin’ny lalambe nisy nangalatra

Fandriampahalemana
Alarobia 06 Desambra 2023

Mihoatra ny 10 hatreto ireo jiro manazava ny lalambe nisy nangalatra

eny amin’iny faritra Anosiala Andakana iny. Mirongatra sy mahazo vahana tanteraka ny tsy fandriampahalemana noho izany, antony nanosika ireo mpitandro ny filaminana sy fokonolona eny an-toerana hifanome tanana hamongotra ireo mpanao ratsy. Lehilahy iray no tratra nanongotra ireo jiro manazava ny lalambe teny amin’ny fokontany Anosiala Andakana omaly Talata ka nahazoana antso tamin’ny mpiara-monina tokony ho tamin’ny 2 ora maraina. Efa nafeniny tany anaty ala kininina ireo fitaovana ireo no tratra izy . Jiro mandeha amin’ny herin’ny masoandro miisa 9 no nangalariny ary efa tafaverina soa amantsara amin’ny fokontany izany. Mbola misy moa ireo namany tsy tratra fa tsy maintsy ho raisim-potsiny tsy ho ela, raha araka ny fanamby napetraky ny fokonolona sy ireo mpitandro ny filaminana.
Pati
Legende : Io afovoany io ilay mpangalatra jiro manazava ny lalambe eny amin’iny faritra Andakana iny !