Fandriampahalemana

ANDAPA Vehivavy 7 no nisy namono tao anatin’ny sivy volana

Fandriampahalemana
Alarobia 01 Jolay 2020

Tovovavy iray efa tsy nisy fofon’aina intsony indray omaly no hita faty tany amin’ny distrikan’Andapa, Faritra SAVA.

Mbola nihosin-dra ny vavan’ity tovovavy ity nandritra ny fotoana nahitana ny vatana mangatsiakany izay marihina fa manodidina ny 20 taona eo ho eo. Teo akaikin’ny Sonatra no nahitana ny razana raha araka ny vaovao. Itompokovavy kosa no fahafiton’ireo vehivavy maty novonoin’olon-tsy fantatra tany an-toerana tao anatin’ny sivy volana raha tsy lazaina intsony ireo voadaroka. Raha araka ny fanazavan’ireo mpanara-baovao ao anaty tambajotran-tserasera facebook dia anisan’ny distrika be mponina Andapa raha oharina amin’i Sambava. Lohalaharana ihany koa anefa izy amin’ny resaka vono olona ary ny mahagaga dia vehivavy avokoa no lasibatra no sady tsy lavitra fa ao an-tampon-tanana avokoa. Antson’ireo mponina any an-toerana araka izany ny tokony hijokoan’ny mpitandro ny filaminana ireo mpanao ratsy amin’ny toerana iray rehefa alina ny andro ary mandefa vehivavy iray hatao jono mandritra izany mba hahatrarana azy.

Pati