AMBOHIDAVA AMBATOLAMPY

Nisehoana vaky fasana, razana lena iray sisa tavela

Fandriampahalemana
Alarobia 07 Febroary 2024

Nitrangana vaky fasana tany Ambohidava, Ambatolampy Tsimahafotsy ny alin'ny

Alatsinainy 05 Febroary lasa teo. Raha araka ny loharanom-baovao azo dia razana iray sisa no navelan’ireo tsy mataho-tody tao am-pasana fa ny ankoatra izay dia lasan’izy ireo avokoa. Tombanana ho razana mbola lena ity najanon’izy ireo ity ka nanahirana azy ny fofony sy ny fangalany ny taolany hoy ireo mponina. Velon-taraina mafy ireo fianakavian’ny maty vokatr’izany. Razana maromaro mantsy no fantatra fa nilevina tao amin’io fasana io ka anisan’izany ireo razambe. Indrisy anefa fa tsy misy azo hatao intsony. Mangataka ny hijeren’ny Fitondram-panjakana akaiky ny trangana tsy fandriampahalemana tahaka izao eto amintsika araka izany izy ireo. Na ny maty na ny velona mantsy dia samy tsy avelan’ireo jiolahy hanam-piadianana fa hanehoany ny haratsiam-panahiny avokoa, izay miseho amin’ny endriny maro samihafa. Fasana ambanin’ny tany moa ity nisy namaky ity raha olona sendra nandalo kosa no nahita ny fahavakisany ka nampandre ny tompon’andraikitra.
Pati
Legende : Ity ilay fasana vaky !