Ambohibe - Mahitsy

Fasana telo no indray vaky

Fandriampahalemana
Alatsinainy 23 Febroary 2026

Toy ny vara-datsaka no nandrenesan'ny

mponina tao Ambohitrandraina, Fokontany Ambohibe Kaominina Mahitsy Distrika Ambohidratrimo fa vaky ny fasam-pianakaviana. Tsy mba iray na roa fa telo be izao no lasibatra. Nanam-potoana mihitsy ny nahavita izany, ary tsy ho vitan'olona iray koa ny nanao azy. Mpiandry omby sendra nandalo no nahatsikaritra ireo fasana efa midanadana, omaly mivoaka omby, ka nampandre haingana ny tao an-tanàna. Vao ny faran'ny herinandro teo koa no nisy tranga vaky fasana toy izao tao amin'ny Fokontany Mahatsara, Kaominina Ambohitrandriamanitra Distrika Manjakandriana. Fanimbazimbana tsotra izao sa fihariana mihintsy ? Iza no ao ambadik'izy io ? Maro ihany mantsy izay mpamaky fasana sy olona tratra niaraka tamin'ny taolampaty izay fa mijanona hatreo ny vaovao fa tsy fantatra hoe mankaiza marina ary atao inona ireny taolampaty marobe tratra ireny ? Eny fa na ny manampahefana aza toa tsy andrenesam-peo sy fanazavana manoloana ity vaky fasana mirongatra manerana ny Nosy ity. Manankasina amin'ny Malagasy izany razana izany. Farafahoriana ho an'ny fianakaviana malagasy izany maty havana any an-tany lavitra na any andafy izany, ka mahatonga azy manao manadatehezana manao izay hampodiana an-tanindrazana ny razana. Ka ny efa eto indray ve no very ?
Jean D.
Iray amin'ireo fasana nisy namaky teny Ambohibe - Mahitsy