AMBOHIBARY ANTSIRABE

Dahalo efa voasambotra maty teo am-pitsoahana

Fandriampahalemana
Talata 10 Oktobra 2023

Dahalo roalahy , mirongo fiadiana indray no saika hamoaka omby am-bala tao Antsira, fokontany sy Kaominina Antsoatany Antsirabe II.

Ny 08 Oktobra lasa teo tokony ho tamin'ny 11 ora alina no nitrangan’izany. Tratran'ny fokonolona am-bodiomby ny iray vokatr’izany raha tafatsoaka kosa ny iray. Natolotra ny zandary ity dahalo tratra ity sy ilay antsy kalazabe maranitra nampiasainy. Raha vantany vao maraina anefa ny andro dia nentina tamin’ny moto izy mba hanoro ny toerana misy ilay namany. Tsy tongan'ny fiara ilay toerana ary izy irery ihany, hono, no mahita ny misy azy. Nanararaotra niporitsaka anefa izy raha nahazo toerana malalaka ka voatery nitifitra ny zandary. Voatery nandao ity tany feno fahasambarana ity ilay dahalo kely vokatr’izany rehefa voamarin'ny dokotera fa nahazo tapakila mandroso tsy miverina ho any amin'ny varo_tsy_mifody. Nalevin’ny fokonolona izy taorian’izany.
Pati