AMBODINISOTRY

Jiolahy gaigilahy lavon'ny balan'ny polisy

Fandriampahalemana
Alakamisy 05 Martsa 2026

Mpanendaka iray no

lavon'ny balan'ny Polisy teny Ambodin’Isotry Cité, omaly Alarobia 04 Febroary atoandro. Araka ny fantatra dia efa tena hikoizana amin'ny fanendahana amin'iny faritra iny sy ny manodidina izy ary efa nokarohin'ny Polisy. Avy nanendaka tovolahy kely mpianatra izy ny maraina ary nanaovan'ny Polisin'ny Kaomisaria Isotry velam-pandrika ka nisy ireo mpitandro filaminana nanao fanamiana sivily mba hisambotra azy. Tazana teny Ambodin'isotry tokoa izy omaly atoandro saingy rehefa hisambotra azy ireo Polisy dia tafaporitsaka tanaty elakelan-trano indray ity jiolahy ity. Raikitra ny fifanenjehana ka rehefa tapi-dalankaleha izy dia namoaka antsy maranitra hamelezana ireo Polisy nanenjika azy. Niaro tena noho izany ny Polisy ka maty vokatry ny ratra nahazo azy tamin'ny tifitra niantefa taminy ity mpanendaka ity. Mbola hita teny amin'ny kitapo nentiny ny finday roa avy nangalarina sy entana maromaro ary karapanondrom-pirenen'ilay tovolahy lasibatra tamin'ny fanendahana nataony.Mbola misy namany karohin'ny Polisy avy ao amin’ny Kaomisarian’Isotry ka miantso ny rehetra tsy hisalasala hitoroka an'ireo olon-dratsy anaty fiaraha-monina.
Pati
Légende : Ity ilay jiolahy voantso tampoka any amin'ny varo tsy mifody !