Fandriampahalemana

Ambodifilao Zazavavy kely iray nisy naka an-keriny

Fandriampahalemana
Zoma 18 Aogositra 2017

Nitrangana toe-javatra nampalahelo teny Ambodifilao afak’omaly Alarobia hariva.

Renim-pianakaviana iray nitondra ny zanany handeha hiantsena no lasibatry ny fakana an-keriny tampoka ka saika niraoka ahitra mihitsy. Vao folo taona monja io zanany vavy nisy naka an-keriny io. Nofaohana fiara mazda iray sendra nandalo ilay zaza izay fantatra fa efa nisoka-baravarana hatrany amin’ny toerana niaingany. Izy mianaka kosa teo an-daniny tsy nanam-po na inona na inona fa nandeha an-tongotra toy ny mpiantsena rehetra. Rehefa tonga teo anoloan”izy ireo anefa ilay Mazda dia nisy lehilahy roa matanjaka nipoitra tampoka nandrirotra ilay tsy manan-tsiny. Avy any Andohananalakely hihazo an’i Soarano io fiara mazda io. Nihazakazaka nanenjika ilay fiara sady nikiakiaka mafy niantso vonjy ilay renim-piankavina sy ireo mpivarotra nangoraka azy saingy tafatsoaka ihany ilay fiara. Tsy mbola hita popoka moa io zazavavy kely io hatramin’ny omaly hariva. Lasa mandry tsy lavo loha avokoa ireo mpiantsena eny Ambodifilao sy ny manodidina. Tsy mijanona amin’ny asa fanendahana sy ny fanaovana sinto-mahery intsony mantsy ireo mpanao ratsy fa efa mirona amin’ny fakana an-keriny ihany koa.