Fandriampahalemana

Amboasary Atsimo Mpampianatra iray maty notifirin’ny dahalo

Fandriampahalemana
Alakamisy 18 Jona 2020

Mpampianatra iray vao 35 taona monja no maty notifirin’ny jiolahy omaly tao kaominin’i Tsivory any amin’ny distrikan’Amboasary Atsimo. Omaly maraina tokony ho tamin’ny 8 ora sy sasany dia nandeha moto niaraka tamina vehivavy iray,

hamonjy tsena ao amin’ny kaominina Marotsiraka ity mpampianatra ity saingy nosakan’ireo olon-dratsy mitam-piadiana. Tsy lavitra ny kaominina Ankilitelo no niseho ny fanafihana. Notifirin’ireo jiolahy, tamin’ny basy Baïkal calibre 12, avy hatrany ilay raim-pianakaviana ka voa teo amin’ny sorony havia. Ilay vehivavy kosa voadaroka, ka naratra. Nentin’izy ireo ny firavaka volafotsy niaraka tamin’ny kitapo nisy ny vola sy entam-barotr’ireo niharam-boina. Raha ny vaovao voaray dia mpanam-bola iray no nokendren’ireo jiolahy, kanefa dia izy mianadahy mianaka indray no lasibatra. Tsy tana ny ain’ilay mpampianatra na dia nentina namonjy hopitaly aza. Efa nalain’ny fianakaviana omaly ihany moa ny razana.

Pati