Fandriampahalemana

ALASORA Mirongatra ny halatra varavaramby

Fandriampahalemana
Alatsinainy 19 Desambra 2022

Lehilahy iray 24 taona no tra-tehaky ny Polisy miasa ao amin'ny Kaomisarian’ Alasora omaly alahady 18 desambra teo rehefa avy nangalatra varavaramby.

Efa maro ireo olona velon-taraina fa very varavaram-by eny amin'iny Alasora sy ny manodidina iny. Ny alin'ny 17 desambra no fantatra fa nisy nangalatra ny varavaramby an'olona mipetraka eny amin'ny manodidina ny tetezan'ny TV Plus iny. Tra-tehak'ireo Polisy nanao fanamiana sivily nanao fisafoana teny Ankadindratombo araka izany ity lehilahy ity nitondra varavaramby maromaro izany fantatra fa vao avy nangalariny. Rehefa noentina natao famotorana teny amin'ny biraon'ny Polisy izy dia fantatra fa efa nisy nitory ihany koa ary efa ela no nitadiavan’ny olona azy. Efa fanta-daza amin'ny resaka halatra sy vaky trano ity lehilahy ity ary efa maro ireo olona nitaraina tamin'izany. Notazonina ao amin’ny biraon'ny Polisin’ Alasora moa ity lehilahy ity mialohan'ny hanolorana azy eny amin'ny fitsarana.
Nangonin’i Pati
Legende : Ilay mpangalatra tratra sy ireo varavaramby avy nangalariny