Fandriampahalemana

Partagé sur :
• facebook

Tany amin’ny Faritra Atsimo Atsinanana sy Vatovavy Fitovinany no niantombohan’ny fidinana ifotony notanterahan’ireo tompon’andraikitra ambony eo anivon’ny zandarimaria hanara-maso akaiky ny fampiharana ny paik’ady sy baiko nomen’ny sekreteram-panjakana miadidy ny zandarimariam-pirenena.

 Nitohy tany amin’ny faritra DIANA sy SAVA ny asa. Ny faritra Andriamena, distrikan’i Tsaratanana sy Andilamena indray no nidinan’ny delegasiona notarihan’ny jeneraly Ramampiandra Christophe, avy ao amin’ny sekreteram-panjakana miadidy ny zandarimariam-pirenena sy ny jeneraly Miasa Manohizara Toussaint, izay avy amin’ny foibem-pibaikoana ny faran’ny herinandro lasa teo. Nandritra ny fifamoriana nataon’ireto delegasiona tamin’ny solontenam-panjakana sy ny solontenam-pokonolona teny an-toerana dia nisy ny loabary an-dasy nitaterana ny lesoka. Nivoitra ihany koa ny soso-kevitra hanatsarana ny fomba fiasa eo amin’ireo lafin-kery mba hipaika mivantana eny amin’ny vahoaka eny ifotony ny fandriampahalemana, araka ny fanazavana. Nalamina ny fiaraha-miasa ka napetraka ny « Kalony » na ny dinam-pokonolona any amin’iny faritra iny, hampihenana ny asan-dahalo mandra-pivalin’ny fangatahan’ny vahoaka hanampiana ny isan’ny mpitandro ny filaminana eny an-toerana sy ny hanamafisana ny fitaovam-piadiana eny am-pelatanan’izy ireo izay mitovy hery amin’ny eny am-pelatanan’ny dahalo. Mbola hitohy any amin’ny faritra hafa ny ezaka atao.

J. Mirija

Tia Tanindrazana

Samia mijoro ho an'i Gasikara.